ދައުލަތް ހިއްސާވާ ކުންފުނިތަކުގެ ހިންގުން ހަރުދަނާކޮށް އެ ކުންފުނިތަކަކީ ދައުލަތުގެ ބަޖެޓުން ޚަރަދުކުރަން ނުޖެހި، ފައިދާގައި ހިންގާ ކުންފުނިތަކަކަށް ހެދުމަށްޓަކައި ތިރީގައިވާ ސިޔާސަތުތައް ތަންފީޒުކުރެއްވުން.

o ދައުލަތް ހިއްސާވާ ކުންފުނިތައް ގިންތިކުރެވޭ އުސޫލު މުރާޖާކޮށް، ކުންފުނިތަކުގެ ޕަރފޯމަންސް ރަނގަޅުކުރުމަށް ޝައުގުވެރިކަން އިތުރުކުރެވޭނެހެން ވަކިވަކި ކުންފުނިތަކަށް ޚާއްޞަ ކީ ޕަރފޯމަންސް އިންޑިކޭޓަރސް (ކޭ.ޕީ.އައިސް) ކަނޑައަޅައި، 3 މަސްދުވަހުގެ ތެރޭގައި ބަދަލުކުރުން.

o ދައުލަތް ހިއްސާވާ ކުންފުނިތަކުގެ ހިންގުން ހަރުދަނާ ކުރުމަށް ނޭޝަނަލައިޒްކޮށް ބާއްވާނެ ކުންފުނިތަކާއި، ޕަބްލިކް ޕްރައިވެޓް ޕާޓްނަރޝިޕް (ޕީ.ޕީ.ޕީ) އުސޫލުން ހިންގާނެ ކުންފުނިތަކާއި އަދި އާންމުންނަށް ހިއްސާ ވިއްކައިގެން (އައި.ޕީ.އޯ) ހިންގާނެ ކުންފުނިތައް ދެނެގަނެ އެކުލަވައިލަންޖެހޭ ސިޔާސަތުތައް 3 މަސްދުވަހުގެ ތެރޭގައި ކަނޑައެޅުން.

o ކުންފުނިތަކުގެ ގަވަރނަންސް ހަރުދަނާކޮށް ބޯޑުގެ ސަބް ކޮމިޓީ، އޮޑިޓް ކޮމިޓީ، ނޮމިނޭޝަން އެންޑް ރެމިއުނަރޭޝަން ކޮމިޓީތައް ހިމެނޭހެން އެކުލަވައިލައި، ފަންކްޝަން ހަރުދަނާކުރުމަށް ގެންނަންޖެހޭ ބަދަލުތައް 3 މަސްދުވަހުގެ ތެރޭގައި ގެނައުން.

o ދައުލަތް ހިއްސާވާ ކުންފުނިތަކަށް ސަބްސިޑީ ދޭންޖެހޭ ހާލަތްތަކާއި، ސަބްސިޑީ އަދި ކެޕިޓަލް ދޭނެ ހަރުދަނާ އުސޫލެއް 3 މަސްދުވަހުގެ ތެރޭގައި ކަނޑައެޅުން.

o އެކަށީގެންވާ ގޮތެއްގައި ޕަރފޯމް ނުކުރާ ކުންފުނިތަކުގެ ހިންގުން މި އަހަރު ތެރޭގައި ހަރުދަނާކޮށް ކޭޝްފްލޯ ހަމަޖެއްސޭނެ ގޮތްތަކެއް ހޯދައިދީ، ކުންފުނިތަކުގެ ޕަރފޯމަންސް ރަނގަޅު ކުރުމަށް 2025 ވަނަ އަހަރުގެ ފުރަތަމަ 6 މަސްދުވަހާ ހަމައަށް މުއްދަތެއް ދީ، މި މުއްދަތުގެ ތެރޭގައި ރަނގަޅަށް ފަރޕޯމް ނުކުރެވޭ ކުންފުނިތައް ރީސްޓްރަކްޗަރ ކުރުމާއި، މާރޖްކުރުން ނުވަތަ އުވާލުމުގެ މަސައްކަތް ފެށުން. އަދި އަލަށް ކުންފުންޏެއް އުފެއްދުމުގައި ޢަމަލުކުރާނެ ހަރުދަނާ އުސޫލެއް 3 މަސްދުވަހުގެ ތެރޭގައި އެކުލަވައިލައި ތަންފީޒުކުރުން.

o ސަރުކާރުން ކުރިއަށްގެންދާ އިންފްރާސްޓްރަކްޗަރގެ ގިނަ މަސައްކަތްތަކެއް ހުއްޓިފައި ހުރިހުރުމަށް ހައްލެއް ގެނައުމުގެ ގޮތުން، މިހާރު މި މަސައްކަތް ކުރަމުންގެންދާ ކުންފުނިކަމަށްވާ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކަމްޕެނީ ޕަބްލިކް ލިމިޓެޑް (އެމް.ޓީ.ސީ.ސީ) ގެ އިތުރުން، އައު ކުންފުންޏެއް އުފެއްދުން.