ތެލަސީމިއާ ޕޭޝަންޓުންނަށް މިހާރު ދެވޭ ޚިދުމަތްތައް ހަރުދަނާކޮށް ފުޅާކުރުމުގެ އިތުރަށް، ހިލޭ ބޯންމެރޯ ޓްރާންސްޕްލާންޓް ހެދޭނެގޮތް މަގުފަހިކޮށްދެއްވުމުގެ ގޮތުން ތިރީގައިވާ ކަންކަން ހަމަޖެއްސެވުން.

• ތެލަސީމިއާ ކުދިންނަށް ބޭނުންވާ ބޭހާއި ކޮންސިއުމަބަލްސް ފަސޭހައިން ލިބޭނެ އިންތިޒާމް އާސަންދަ އަދި ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑް (އެސްޓީއޯ) މެދުވެރިކޮށް ހަމަޖެއްސުމާއި އާސަންދައިގެ ދަށުން ޑީ.އެން.އޭ ޓެސްޓް ހެދޭނެ އިންތިޒާމު ހަމަޖެއްސުން.

• ތެލަސީމިއާ އާ ގުޅޭގޮތުން މަޢުލޫމާތު ދިނުމަށްޓަކައި، ކަމާބެހޭ މިނިސްޓްރީތަކާއި، އޮފީސްތައް އަދި އަމިއްލަ ޖަމާޢަތް/ޖަމްޢިއްޔާތައް ގުޅިގެން މުޅި ރާއްޖޭގައި ހޭލުންތެރިކުރުމުގެ ކެމްޕެއިނެއް ފެށުން.

• ތެލަސީމިއާ ބަލި ތަހައްމަލުކުރަމުންދާ ހުރިހާ ކުދިންގެ ބޯންމެރޯ ޓްރާންސްޕްލާންޓް ހަދައި ނިންމޭނެގޮތަކަށް ދުރު ރާސްތާގެ ޕްލޭން އެކުލަވައިލެއްވުން.

• ތެލެސީމިއާ ޕޭޝަންޓުން ހަދަންޖެހޭ "ޓީ 2 ސްޓާރ" ޓެސްޓުގެ ޚިދުމަތް ހުޅުމާލޭ ހޮސްޕިޓަލުގައި ފެށުމަށް ބޭނުންވާ -/700,000 (ހަތް ލައްކަ) ރުފިޔާ ބަޖެޓުގައި ހިމެނުން.

• ގްރޭޑް 10 ނިމުމުގެ ކުރިން ތެލަސީމިއާއަށް ޓެސްޓް ކުރުމަކީ މަޖުބޫރު ކަމެއްގެ ގޮތުގައި ކަނޑައަޅައި، ތެލަސީމިއާއަށް ޓެސްޓް ކުރުމުގެ ޕްރޮގްރާމްތަކެއް ސްކޫލްތަކުގައި ހިންގުން.

• ބޯންމެރޯ ޓްރާންސްޕްލާންޓުގެ ޚިދުމަތާއި، ބޯންމެރޯ ޓްރާންސްޕްލާންޓް ހެދުމަށްފަހު އެ ފަރާތްތަކަށް ބޭނުންވާ އިތުރު ޚިދުމަތްތަކާއި އަދި ތެލަސީމިއާ ބަލި ތަހައްމަލުކުރަމުންދާ ކުދިންނަށް ހިތްގައިމު ތަޖުރިބާއެއް ކުރެވޭނެފަދަ މާހައުލެއް ލިބިދެވޭނެފަދަ، ފެންވަރު ރަނގަޅު ސްޓޭޓް-އޮފް-ދަ-އާޓް ތެލަސީމިއާ ސެންޓަރެއް (އެކޮމޮޑޭޝަން ބްލޮކަކާއެކު) އެޅުމަށްޓަކައި، ކުރަންޖެހޭ ކަންކަން މިވަގުތުން ފަށައިގެން ކުރިއަށް ގެންދެވުން. އަދި މި ޢިމާރާތް އެޅުމަށް ބޭނުންވާ ބިން ހުޅުމާލެއިން ހަމަޖެއްސުން.

• މި މަޝްރޫޢަށް 25 މިލިއަން ޑޮލަރުގެ ބަޖެޓެއް ކަނޑައަޅައި، އެ ފައިސާ ރާއްޖެއިންނާއި ރާއްޖެއިން ބޭރުން ހޯދުމުގެ ކަންކަން ކުރިއަށްގެންދިއުން.

• ތެލަސީމިއާ ކުދިންނަށް އެހީތެރިވުމަށްޓަކައި ބޭނުންވާ ފައިސާ ހޯދުމުގެ ކަންކަން، ޒަކާތު ފަންޑުންނާއި ބޭރުގެ އެކިއެކި ޖަމާޢަތް/ޖަމްޢިއްޔާތަކާ ގުޅިގެން މިނިސްޓްރީ އޮފް އިސްލާމިކް އެފެއާޒުން ކުރިއަށްގެންދިއުން.

• ސައިޕްރަސް އަކީ ތެލަސީމިއާ ކުދިން ނިސްބަތުން ގިނަ ޤައުމަކަށްވެފައި އެ ޤައުމުން އެކުދިންނަށް ދެމުންގެންދާ ފަރުވާއާގުޅޭ ތަޖުރިބާ ހިއްސާކުރުމުގެ ޝައުޤުވެރިކަން އެ ޤައުމުން ފާޅުކުރައްވާފައިވާތީ، މި ދާއިރާއިން އެ ޤައުމުގެ އެހީތެރިކަން ހޯދުމަށްޓަކައި ކުރަންޖެހޭ ކަންކަން ކުރުން.

• ދިވެހި ސަރުކާރުން އިޓަލީވިލާތާއެކު ކުރިން ހަދާފައިވާ މެމޮރެންޑަމް އޮފް އަންޑަސްޓޭންޑިންގ (އެމް.އޯ.ޔޫ) ގެ ކަންކަން މިހާރު ކުރިއަށްނުދާތީ، މިފަދަ އެމް.އޯ.ޔޫ އެއްގައި އަލުން އެ ޤައުމާއެކު ސޮއިކުރުމަށް ކުރަންޖެހޭ ކަންކަން ކުރުން.

• ކޮންމެ އަތޮޅެއްގައި ތެލަސީމިއާ ޓެސްޓް ހެދޭނެ އިންތިޒާމުތައް ހަމަޖެއްސުން.

• ރާއްޖޭގެ ޓަރޝަރީ ހޮސްޕިޓަލްތަކުގައި ބްލަޑް ބޭންކް ޤާއިމްކުރުމަށް ކުރަންޖެހޭ ކަންކަން ކުރުން.

• 20 އަހަރުދުވަހުގެ ނޭޝަނަލް މާސްޓަރ ޕްލޭންގެ ތެރޭގައި، ރާއްޖެއިން ތެލަސީމިއާ ނައްތާލުމަށް ލަނޑުދަނޑިތަކެއް ކަނޑައަޅައި އެ ލަނޑުދަނޑިތައް ހާސިލްވާނެގޮތަށް، ތެލަސީމިއާ މާސްޓަރ ޕްލޭނެއް އެކުލަވައިލުން.